Aziz Salihu organizon mbledhjen e nënshkrimeve të qytetarëve për ndërkombëtarizim

Kryetari i Shoqatës së Sportistëve Profesionistë të Kosovës, Aziz Salihu, ka mbajtur sot një konferencë me media, në të cilën ka bërë të ditur se me iniciativën e tij në të gjitha qytetet e Kosovës, do të nis mbledhja e nënshkrimeve nga qytetarët e Kosovës për ndërkombëtarizimin e sportit kosovar.
“Të gjitha nënshkrimet e mbledhura nga qytetarët, pas një jave do t’i dërgohen Komitetit Olimpik Ndërkombëtar”, ka theksuar Salihu, i cili ende shpreson se Kosova mund të përfaqësohet në Olimpiadën e Pekinit që nis më 8 gusht me sportistët e saj. “Ka mbetur vetëm edhe një muaj deri në Olimpiadë, por unë shpresoj ende se sportistët tanë mund të marrin pjesë në Pekin dhe unë do të vazhdoj përpjekjet për të realizuar këtë synim”, ka pohuar Salihu, i cili më pas ka kërkuar dorëheqjen e anëtarëve në Grupin për Ndërkombëtarizim, ku bëjnë pjesë ministri Valton Beqiri dhe disa prej krerëve të federatave sportive.